Anonymous - Twa Corbies lyrics

As I was walking all alane, I heard twa corbies makin a mane; The tane unto the ither did say, "Whar sall we gang and dine the-day?" "In ahint yon auld fail dyke, I wot there lies a new slain knight; And nane do ken that he lies there, But his hawk, his hound an his lady fair." "His hound is tae the huntin gane, His hawk tae fetch the wild-fowl hame, His lady's tain anither mate, So we may mak oor dinner swate." "Ye'll sit on his white hause-bane, And I'll pike oot his bonny blue een; Wi ae lock o his gowden hair We'll theek oor nest whan it grows bare." "Mony a one for him makes mane, But nane sall ken whar he is gane; Oer his white banes, whan they are bare, The wind sall blaw for evermair."