Anonyme - Nouvelle 19, L'enfant neige lyrics

Ardent desir de veoir pays, savoir et cognoistre pluseurs experiences qui par le monde universel journellement adviennent, nagueres si fort eschaufa l'atrempé cueur et vertueux courage d'un bon et riche marchant de Londres en Angleterre qu'il abandonna sa belle et bonne femme et sa belle maignye d'enfans, parens, amis, heritages et la plupart de se chevance; et se partit de son royaulme, a**ez et bien fourny d'argent, content et de tres grande abundance de marchandises dont le païs d'Angleterre peut les autres servir, comme d'estains, de riz, et foison d'aultres choses que pour bref je pa**e. En ce son premier voyage vaca le bon marchant l'espace de 5 ans, pendant lequel temps sa bonne femme garda tresbien son corps, fist le prouffit de pluseurs marchandises, et tant et si tresbien le fist que son mary, au bout desdiz 5 ans retourné, beaucop la loa et plus que paravant l'ama. Le cuer audit marchant, non encores content tant d'avoir veu et cogneu pluseurs choses estranges et merveilleuses comme d'avoir gaigné largement, le feist arriere sur la mer bouter 5 ou 6 mois puis son retour; et sen reva a l'adventure en estrange terre, tant de Chrestians que de Sarrazins, et ne demoura pas si pou que les 10 ans ne furent pa**ez ains que sa femme le revist. Trop bien luy rescripvoit a**ez souvent, a celle fin qu'elle sceut qu'il estoit encores en vie. Elle, qui jeune estoit et en bon point et qui point n'avoit de faulte de biens de Dieu - fors seulement de la presence de son mary -, fut contraincte par son trop long demourer de prendre ung lieutenant, qui en peu d'heure luy fist ung tres beau filz. Ce filz fut elevé, nourry et conduit avec les aultres ses freres d'un costé. Et au retour du marchant, mary de sa mere, avoit environ 7 ans. La feste fut grande, a ce retour, d'entre le mary et la femme. Et, comme ilz fussent en joyeuses devises et plaisans propos, la bonne femme, a la semonce de son mary, fait venir devant eulx tous leurs enfants, sans oublier celuy qui fut gaigné en l'absence de celuy qui en avoit le nom. Le bon marchant, voyant la belle compaignie de ses enfans, recordant tresbien du nombre d'eulx a son departement, le voit creu d'un, ce dont il est tresfort esbahy et moult esmerveillé. Si va demander a sa femme qui estoit ce beau filz, le derrenier en reng de leurs enfans. " Qui c'est? dit elle, par ma foy, sire, c'est nostre filz, a qui seroit il? -Je ne sçay, dist il, mais pour ce que plus ne l'avoie veu, avez vous merveille si je le demande? -Saint Jehan! nenny, dist elle, mais il est nostre filz. -Et comment se peut il faire? dist le mary, vous n'estiez pas grosse a mon partement. -Non vrayement, dit elle, que je sceusse, mais je vous ose bien dire à la verité que l'enfant est vostre et que aultre que vos a moy n'a touché. -Je ne dy pas aussi, dit il, mais toutesfoiz il y a 10 ans que je party et cest enfant se monstre de 7: comment doncques pourroit il estre mien? L'ariez vous plus porté que ung aultre? -Par mon serment, dit elle, je ne sçay, mais tout ce que je vous dy est vray. Si je l'ay plus porté qu'un aultre, il n'est rien que je ne sache. Et si vous ne le me feistes au partir, je ne sçay, moy, penser dont il peut estre venu, sinon que, a**ez tost apres vostre partement, ung jour, j'estoie par ung matin en nostre grand jardin, ou tout a coup me vint ung soudain appetit de menger une feuille d'oseille, qui pour l'heure de adonc estoit couverte et soubz la neige tappie. J'en choisy une entre les aultres, belle et large, que je cuiday avaler, mais n'estoit que ung peu de nege blanche et dure. Et ne l'eu pas si tost avalee que ne me sentisse en tel estat que je me suis trouvee quand mes aultres enfans ay porté. De fait, a chef de terme, je vous ay fait ce tresbeau filz. ". Le marchant cogneut tantost qu'il en estoit noz amis, mais il n'en voult faire semblant, ainçois se vint adjoindre par parolles a confermer la belle bourde que sa femme luy bailloit, et dit " M'amye, vous ne dictes choses qui ne soit possible, et que a aultres que a vous ne soit advenue. Loé soit Dieu de ce qu'il nous envoye! S'il nous a donné ung enfant par miracle, ou par aucune secrete fa**on dont nous ignorons la maniere, il ne nous a pas oblié d'envoier chevance pour l'entretenir. ". Quand la bonne femme voit que son mary veult condescendre a croire ce qu'el luy dit, elle n'est moyennement joyeuse. Le marchant, sage et prudent, en 10 ans qu'il fut puis a l'ostel sans faire ses loingtains voyages, ne tint oncques manieres envers sa femme, en parolles ne aultrement, par quoy elle peust penser qu'il entendist rien de son fait, tant estoit vertueux et pacient. Il n'estoit pas encore saoul de voyager; si le vouloit recommencer et le dist a sa femme, qui fist semblant d'en estre tresmarrie et mal contente. " Appaisez vous, dit il, s'il plaist a Dieu et a monseigneur saint George, je reviendray de bref. Et pour ce que nostre filz que feistes a mon aultre voyage est desja grand et habile et en point de veoir et d'aprendre, si bon vous semble, je l'emmeneray avecques moy. -Et par ma foy, dit elle, vous ferez bien et je vous en prie. -Il sera fait ", dit il. A tant se part et emmaine le filz dont il n'estoit pas pere, a qui il a pieça gardé une bonne pensee. Ilz eurent si bon vent qu'ilz sont venuz au port d'Alixandrie, ou le bon marchant tresbien se deffist de la pluspart de ses marchandises. Et ne fut pas si beste, affin qu'il n'eust plus de charge de l'enfant de sa femme et d'un aultre, et que apres sa mort ne seccedast a ses biens, comme ung de ses aultres enfants, qu'il ne le vendist, a bons deniers contens, pour en faire ung esclave; et pour ce qu'il estoit jeune et puissant, il en eust pres de 100 ducatz. A chef de piece, il s'en revint en Angleterre, sain et sauf, Dieu mercy. Et n'est pas a dire la joye que sa femme luy fist quand elle [le] vit en bon point. Elle ne voit point son filz, si ne scet que penser. Elle ne se peut gueres tenir qu'elle ne demandast a son mary ce qu'il avoit fait de leur filz. " Ha! m'amye, dist il, il ne le vous fault pas ja celer: il luy est tresmal prins. -Helas! comment? dit elle. Est il noyé? -Nenny vraiement, dist il, mais il est vray que fortune de mer par force nous mena en ung pais ou il faisoit si chault que nous cuidions tous morir par la grant ardeur du soleil, qui sur nous ses raidz espandoit. Et comme ung jour nous estions sailliz de nostre nave pour faire en terre chascun une fosse pour nous tappir pour le soleil, nostre bon filz, qui de neige -comme sçavez- estoit, en nostre presence, sur le gravier, par la grand force du soleil, fut tout a coup fondu et en eaue resolu. Et n'eussiez pas dict 7 pseaulmes que nous ne trouvasmes plus rien de luy: tout aussi a haste qu'il vint au monde, aussi soudainement en party. Et pensez que j'en fuz et suis bien desplaisant. Et n'y eut jamais autre chose entre les merveilles que j'ay veues dont je fusse si esbahy. -Or avant, dit elle, puuis qu'il a plu a Dieu le nous oster, comme il le nous avoit donné, loé soit il! ". Si elle se doubta que la chose allast aultrement, l'ystoire s'en taist et ne fait mencion, fors que son mary luy rendit telle qu'elle luy bailla, combien qu'il en demoura toujours le cousin.