Quant a mors trobet partit
Mon cor de son pesamen,
D'una tenson m'asalhit,
podetz auzir comen.
Amix Peirols, malamen
Vos anatz de mi lunhan;
E pus e mi ni enchan
Non er vostr'entencios,
Diguatz; pueys que valretz vos?
«Amors, tan vos ai servit.
E nulhs pechatz no'us en pren,
E vos sabetz quan petit
N'ai avut de jauzimen.
No'us ochaizo de nïen,
Sol que'm fa**atz derenan
Bona patz, qu'als no'us deman;
Que nulhs autres guazardos
No m'en pot esser tant bos.»
«Peirols, metetz en oblit
La bona domna valen
Que tan gent vos aculhit
E tan amorozamen,
Tot per mon comandamen?
Trop avetz leugier talan!
E no'us era ges semblan;
Tan guays e tan amoros
Eratz en vostras chansons.»
«Amors, anc mais no fatlhit.
Mas ar falh forsadamen;
E prec Dieu Jhesu que'm guit,
E que trameta breumen
Entre'ls reys acordamen,
Que'l socors vai trop tarzan.
Et auria mestier gran
Que'l marques valens e pros
N'agues mais de companhos.»
«Peirols Turc ni Arabit
Ges per vostr' envazimen
No laissaran Tor Davit.
Bon cosselh voss don e gen:
Amatz e chantatz soven!
Iretz vos, e'l rey no'i van?
Veiatz las guerras que fan,
Et esguardatz dels baros
Cossi trobon ochaizos!»
«Amors, si li rey no'i van,
Del Dalfi vos die aitan:
Ja per guerra ni per vos
No remanra, tant es pros.»
«Peirols, maint amic partran
De lurs amiguas ploran,
Que si Saladis no fos,
Sai remazeran joios."